രാഷ്ട്രീയ ആത്മഹത്യ ചെയ്യരുത്.

ജോസ് കെ മാണിയെ ഉപദേശിയ്ക്കാനുള്ള ഇല്ല. എങ്കിലും ഒരു പാലാക്കാരൻ എന്ന നിലയിൽ പറയുകയാണ്….. രാഷ്ട്രീയ ആത്മഹത്യ ചെയ്യരുത്…….!37 MLA മാരുമായി, കെ മുരളീധരനുവേണ്ടി കെ കരുണാകരൻ ഇറങ്ങിപ്പുറപ്പെട്ടിട്ട്…… MLA മാരുടെ ആംഗബലം പതിയെ 35 ആയി… പിന്നെ 33, പിന്നെ 31 , പിന്നെ 29 …… അങ്ങനെയങ്ങനെ …. ഒടുവിൽ എന്തായി എന്ന് താങ്കൾ കണ്ടതാണ്. പിന്നീട് മുരളീധരന് ”ഒരു മൂന്നു രൂപയുടെ അംഗത്വം തരുമോ” എന്ന് കെഞ്ചി കോൺഗ്രസിന്റെ വാതിൽക്കൽ എത്രകാലം കാത്തുകെട്ടിക്കിടക്കേണ്ടിവന്നു എന്നും താങ്കൾ കണ്ടതാണ്. താങ്കൾ ആ അവസ്ഥയിലേയ്ക്ക് വരരുത്. താങ്കൾക്ക് ചുറ്റും നിൽക്കുന്ന മുഖസ്തുതിപാഠകർ താങ്കളെ കുഴിയിൽ ചാടിയ്ക്കും, എന്ന് മാത്രമല്ല, താങ്കൾ വീണു എന്നുറപ്പായിക്കഴിഞ്ഞാൽ അവർ താങ്കളെ ഉപേക്ഷിച്ചുപോവുകയും ചെയ്യും. അവരെ പറഞ്ഞിട്ട് കാര്യമില്ല, അവർക്കും നിലനിൽപ്പാണ്‌ പ്രധാനം. ‘മക്കൾരാഷ്ട്രീയ’ ത്തിലൂടെ മാത്രം വന്നതാണ് താങ്കൾ. അതിനോട് കേരളത്തിലെ സമൂഹത്തിനു പൊതുവെ താല്പര്യമില്ല. അതുകൊണ്ടുതന്നെ കേരളസമൂഹത്തിന്റെ മനസാക്ഷി താങ്കളോടൊപ്പമുണ്ടോ എന്ന് സ്വയം (മുഖസ്തുതി പാടുന്നവരെ ഒഴിവാക്കി) ഒന്ന് വിലയിരുത്തി നോക്കുന്നത് നന്നായിരിയ്ക്കും. കോൺഗ്രസിന്റെയും, എന്നും മാണിയോട് അടുത്ത സൗഹൃദം സൂക്ഷിച്ചിരുന്ന മുസ്ലിം ലീഗിന്റെയും മനസും താങ്കളോടൊപ്പം ഉണ്ടെന്നു താങ്കൾ ഇനിയും വിശ്വസിയ്ക്കുന്നുണ്ടോ? ജോസഫിന്റെ സീനിയോറിറ്റി അംഗീകരിയ്ക്കുന്നവരാണ് പൊതുസമൂഹം എന്ന് താങ്കൾ ദയവായി മനസിലാക്കണം. ജോസഫിനൊപ്പം ഉറച്ചുനിന്നുകൊണ്ട് മറ്റൊരു മുൻനിര നേതാവായി തുടരുന്നത് താങ്കൾക്ക് ഭാവിയിൽ ഗുണം ചെയ്യും. മാണിസാർ ഇല്ലാത്ത കേരളാകോൺഗ്രസിൽ താങ്കൾക്ക് ശക്തി കുറവാണ് എന്ന സത്യം ദയവായി തിരിച്ചറിയുക. ബാർ കോഴയിൽ താങ്കളുടെ പാർട്ടി കോൺഗ്രസിനെതിരെ നടത്തിയ നീക്കങ്ങളും മുന്നണി വിട്ടതും, അപ്പോഴും ജോസഫ് യുഡിഫ് ൽ തന്നെ മനസുകൊണ്ട് ഉറച്ചുനിന്നതും, ഒടുവിൽ ജോസഫിന്റെ നിലപാട് മാണിസാറിനും അംഗീകരിയ്ക്കേണ്ടിവന്നതും, താങ്കൾ മറന്നാലും കോൺഗ്രസ് മറന്നിട്ടുണ്ടാവില്ല എന്നറിയുക. ഒരു ചെറിയ കഷണമായി നിൽക്കുന്ന ജേക്കബിനും പിള്ളയ്ക്കും അവരവരുടെ തട്ടകങ്ങളിൽ പിന്തുണയുണ്ട്. എന്നാൽ താങ്കൾ ഇങ്ങനെപോയാൽ പാലായിൽ ഒരു MLA പോലും അകാൻ സാധിയ്ക്കില്ല എന്ന് ഞങ്ങൾ ഭയക്കുന്നു. രാഷ്ട്രീയ ആത്മഹത്യ ചെയ്യരുത്, പ്ലീസ്……… !! (കേരളാ കോൺഗ്രസ് ശക്തമായി കേരളരാഷ്ട്രീയത്തിൽ ഉണ്ടാവണം എന്നാഗ്രഹിയ്ക്കുന്ന ഒരു വോട്ടർ)l